السحر الاسود ج 1 بقلم الهواري

فـي لـيلة دخلتـي حـماتي حطتـلي السحـر في قميـص النـوم بتاعـي بس مكانتـش تعـرف أن بنـتها هي اللي هتـلبس القمـيص ده.....!!!! كنت فاكرة إن أكتر حاجة ممكن تخوف أي عروسة ليلة فرحها هي التوتر، أو الخوف من المسؤولية والحياة الجديدة، لكن اللي حصل معايا خلاني أتمنى لو كان كابوس عادي وأفوق منه.... من أول يوم شفت فيه حماتي "الحاجة أمينة"، حسيت إن فيه حاجة غلط.. حاجة مش مريحة. كانت تضحك في وشي، وتحضني قدام القرايب، وتتكلم معايا بكل خير، بس كل مرة عينها كانت بتيجي في عيني، كنت بحس بـ قشعريرة وسُقعة غريبة بتجري في دمي. نظراتها ليا كانت طويلة ومريبة، كأنها بتدبر لمصيبة أكبر من مجرد جوازة ابنها "محمود". قعدت أقول لنفسي "أنتِ بتتوهمي يا بت يا ولاء، دي ست كبارة ومقامها من مقام أمك"، بس يوم الفرح كل حاجة اتكشفت على أصلها. قبل الزفة بساعة، كنت قاعدة في أوضة العروسة في القاعة بالعباسية.. البنات والخلان داخلين خارجين، والكوافير بيحط اللمسات الأخيرة. وفجأة، الباب انفتح ودخلت حماتي.. قالت إنها جاية تطمن عليا، أخدتني في حضنها، وبعدين لفت وشها للبنات وقالت بـ نبرة حازمة: "اخرجوا يا بنات دقيقة برة، عايزة أقول لعروسة ابني كلمتين سر". مستغربتش وقتها.. قولت دي حسبة أمومة. بس أول ما الباب اتقفل وبقينا لوحدنا، مسكت إيدي جامد لدرجة إن ضوافرها علّمت في جلدي، وبصت لي بنظرة عمري ما هنسى سوادها.. وقالت بصوت فحيح زي الأفاعي: * "فتحي عينك يا بت.. وخلي بالك من القميص الأبيض اللي أنا جهزتهولك الليلة دي بالذات!" ابتسمت بخوف وقولت لها: "حاضر يا طنط، عيني ليه". بس هي مابتسمتش.. فضلت مبرقة في وشي لثواني طويلة، وبعدين سابت إيدي وخرجت. الكلمة في حد ذاتها عادية، بس الطريقة والنبرة كانت تقطع الخلف! بعد الفرح والزفة، وصلنا شقتنا الجديدة في المطرية. ووسط الهيصة وتعب اليوم، دخلت أوضتي أريح جسمي شوية قبل ما أغير فستان الفرح. لقيت علبة قطيفة شيك جداً محطوطة فوق السرير ومكتوب عليها اسمي.. افتكرتها هدية من صحباتي. فتحتها، لقيت جواها قميص نوم أبيض فخم من غالي الأتمان، ومعاه ورقة صغيرة مكتوب فيها بخط مائل: "هدية مخصوص ليكي يا عروسة". من غير إمضاء! في ثانية، رن في ودني كلام حماتي في القاعة: "خلي بالك من القميص الأبيض". قولت في سري أكيد هي اللي بعتاه ومكسوفة تقول. مأخدتش في بالي، ولما جيت أرفع القميص عشان أشوفه، حسيت بـ كلكوعة صغيرة متدارية بين الثنيات والستان. نفضت القميص بقوة.. وفجأة، وقعت حاجة سودة صغيرة على السيراميك. في الأول افتكرتها فتلة خيط مكركبة، بس لما وطيت وقربت منها، لقيتها "خصلة شعر" سودة، ملفوفة ومتلفتة بعناية شديدة ومربوطة بـ خيط صوف أحمر دموي، وجواها ورقة بصل صغيرة مرسوم عليها طلاسم ورموز مش مفهومة! الدم هرب من عروقي واتجمدت في مكاني.. إيه القرف ده؟ وإيه اللي جاب العمل ده جوة القميص؟! في اللحظة دي، سمعت صوت جوزي محمود بينادي عليا من الصالة وهو بيقرب من الأوضة.. اتووشت وضربني السلك، ولسبب أنا نفسي مش فاهماه، قمت لامة الخصلة وخبيتها في أبعد درج في الكومودينو، وقررت إني مستحيل هلمس القميص ده الليلة.. لبست حاجة تانية وخلاص. عدت الليلة.. بس من تاني يوم، الحارة كلها عرفت إن بيتنا قايدة فيه النار! مشاكل من الهوا.. محمود جوزي اللي كان هادي وطيب، بقى عصبي، وعينه بتطق شرار من أقل كلمة، وبقى يقرف يقعد معايا في الأوضة. وحماتي بقت تزرنا كل يوم تقريباً بحجة المباركة، وفي كل زيارة كانت تقعد تلمح وتسألني سؤال واحد وعينها بتلف في الأوضة: "لبستي القميص الأبيض اللي جالك يا ولاء؟" كل مرة أقولها: "لأ يا طنط، لسه ملقتش فرصة".. كانت تبتسم ابتسامة صفرا تظهر سنانها، وتغير الموضوع. بعد أسبوع.. نزلت رحت لبيت أمي، ورجعت بدري عن ميعادي بشوية. فتحت باب الشقة بالراحة، لقيت حماتي قاعدة في الصالة، ومعاها بنتها "هبة".. أخت جوزي الصغيره، بنت في أول العشرينات، ضحكتها كانت تملى البيت وكل الحارة بتحب خفت دمها. أول ما عتبت الممر، سمعت هبة بتقول لأمها بدلع: "يا ماما هو فين القميص الأبيض الفخم اللي كنتِ بتقولي عليه؟ أنا عايزة أشوفه". ساعتها حماتي اتلخبطت، ووشها جاب مية لون، وزعقت فيها لأول مرة بقسوة: "اتلمي يا بت ومالكيش دعوة بحاجة متخصكيش!".. هبة ضحكت وقالت: "والله لهشوفه وألبسه كمان". الموضوع عدى.. بس الشك لغوص في قلبي، وبقيت بمشي ورا حماتي بعيني. وفي يوم وأنا بروق الأوضة، افتكرت خصلة الشعر والعمل اللي في الدرج.. طلعتها، وأخدت بعضي ورحت لـ ست مبروكة وكبيرة في السن في بلدنا معروفة بالحكمة وقراية الأثر.. حطيت الخصلة قدامها من غير ما أنطق بحرف. أول ما الست شافت الخصلة والورقة بصل، وشها اتقلب وبصت لي بـ فزع: "مين اللي عمل فيكي الوعكة دي يا بنتي؟! مين اللي جابلك الأثر ده؟" قولت لها برعب: "ليه يا خالة؟ فيه إيه؟" ردت بصوت واطي يقشعر له البدن: "ده سحر أسود بالمرض والجنون والخراب.. معمول عشان اللي تلبسه يتقلب حالها وتكره دنيتها وتشوف جهنم بعينها.. خدي الأثر ده ارميه في مية جارية بعيد عن عتبة بيتك، لإن اللي عمله كان ناوي ليكي على أذية تموتك!" رجعت البيت وأنا ركبي بتخبط في بعضها من الرعب.. وعرفت إن حماتي كانت عايزة تدمرني ليلة دخلتي. بس الحقيقة كانت أبشع وأقرب مما تتخيلوا! بعدها بيومين، كنت قاعدة في شقتي، لقيت تليفوني بيرن.. دي هبة أخت جوزي، كانت بتتكلم وصوتها فيه ضحكة غريبة مش مريحة، وقالت لي بنبرة سريعة: "تعالي بسرعة يا ولاء.. تعالي شوفي المفاجأة اللي عملتها". سألتها: "فيه إيه يا هبة؟" وقبل ما ترد السكة اتقفلت. نزلت جري على شقة حماتي في الدور الأول.. أول ما فتحت الباب، لقيت البيت كله مقلوب.. صوت صراخ، عياط، وزعيق مسمع لآخر الحارة! الشغالين بيجروا، وأقاربهم ملمومين. جريت في الممر وبصرخ: "فيه إيه؟ حصل إيه يا جماعة؟" محدش بيرد عليا. لحد ما دخلت الصالة الكبيرة.. وشوفت الصدمة اللي شلت رجلي مكانها! هبة كانت قاعدة على الأرض.. وشها باهت كأنه جثة، عيونها مبرقة وزايغة بشكل مرعب، وريقها سايل على جناب بوقها.. وبين إيديها، كانت ماسكة "قميص النوم الأبيض" بتاعي! القميص اللي أنا رفضت ألبسه، واللي اختفى من دولابي قبلها بيومين ومن غير ما أعرف مين اللي سرقه! لفيت وشي وبصيت لحماتي "أمينة".. كانت واقفة في ركن الصالة، وشها أصفر ليموني، وضهرها محني كأنها شافت ملك الموت قدامها.. ولأول مرة، الشجاعة والمنظرة اتمسحت منها، وكانت بتموت من الرعب! ولما عيوننا اتقابلت، همست بحسرة وندم قطع حشاها، وقالت وهي بتلطم على وشها: * "بنتي.. هي اللي لبسته..." وبعدها حطت إيدها على راسها وصوتت وانهارت على الأرض مغمى عليها، في الوقت اللي كانت فيه هبة بتبص للفراغ، وبتضحك ضحكة فحيح مرعبة بصوت خشن وغريب وعميق، صوت مستحيل يكون صوت هبة البنت الرقيقة، وقعدت تكرر جملة واحدة هزت حيطان البيت: "هو رجع... هو رجع عشان ياخد حقه القديم من عيلتكم!" بقلم الهواري تفتكروا إيه السر القديم اللي السحر صحاه في البيت؟ وإزاي هبة هتتحول لمصيدة تفضح أمها قدام الحارة كلها؟ والأهم.. محمود هيعمل إيه لما يعرف إن أمه هي اللي دمرت أخته بالسحر؟

مقالات ذات صلة

أخويا اتجوز سنة ج 1 حكـايات رومـاني مكـرم

فـاتورة ٨ سنين ج الاخيـر حكـايات منـي الـسـيد

روماني مكرم ج 1

زوجتي_حملت_وأنا_عـ,ـقيم

إنتِ النهارده مش هتقعدي على السفرة ج 1 حكـايات منـي الـسـيد

عزومة العيلة ج 1 حكـايات رومـاني مكـرم

اترك تعليقاً إلغاء الرد